Astratto

Bhí tionchar mór ag Giulio Turcato ar an teibíocht iarchogaidh san Iodáil ach, mar sin féin, ní féidir é a lua go héasca le haon ghluaiseacht le linn na tréimhse sin. Tar éis dó céim a bhaint amach san ealaín sa Veinéis, bhog sé go Palermo agus Milano sular shocraigh sé síos sa Róimh ar deireadh thart ar 1943. Sa phríomhchathair, ba ghnách dó dul chuig áiteanna a mbíodh lucht an chultúir ag tarraingt orthu agus chuir sé aithne ar ealaíontóirí a raibh an dearcadh fadbhreathnaitheach céanna acu. Ag an am sin, níorbh fhéidir an cultúr agus an pholaitíocht a scaradh ó chéile agus, tar éis dó troid ar son fhrithbheartaíocht na hIodáile, theastaigh ó Turcato a chuid ealaíne agus a chlaonadh polaitiúil a thabhairt le chéile tuilleadh. Agus na smaointe sin mar threoir aige, shínigh sé forógra an fhoirmiúlachais in 1947 agus bhunaigh sé an grúpa Forma 1. In 1952, chuaigh sé leis an Gruppo degli Otto (i dteannta Emilio Vedova atá mar chuid den Bhailiúchán seo freisin). Mar sin féin, chruthaigh righneas teoiriciúil Turcato teannas go sciobtha laistigh dá chuid grúpaí agus de na páirtithe polaitiúla a raibh baint acu leo. Is an-léiriú é Astratto ar stíl na hIodáile le linn na 1970idí-1980idí. Agus é ag imeacht ó nádúr fiáin, foréigneach fiú, an todhchaíochais agus an eispriseanachais theibí, mhoilligh Turcato a chuid ealaíne de réir a chéile, rinne sé na línte agus na dathanna inti níos boige agus chuir sé ábhar machnaimh ar leith ar fáil don am sin. Cuireann an chothromaíocht íogair chrómatach agus ghrafach atá le fáil sa phictiúr seo béim ar na príomhthréithe a bhaineann le cur chuige Turcato.