Mill-arti impenjata għall-artiviżmu demokratiku
Introduzzjoni
Il-wirja Changemakers tesplora kif l-arti tista’ sservi bħala mezz għall-bidla fis-soċjetà billi jintwerew flimkien ix-xogħlijiet ta’ diversi ġenerazzjonijiet ta’ artisti viżivi. Hija tħares lejn artisti Ewropej mit-tieni nofs tas-seklu 20, li xogħolhom indirizza kwistjonijiet soċjali u politiċi, u tikkuntrastahom ma’ artisti żgħażagħ kontemporanji li jipprattikaw l-artiviżmu – ġeneru ibridu li jgħaqqad it-tekniki tal-arti viżiva u tal-ispettaklu mal-istrateġiji u l-objettivi tal-attiviżmu[i].
Iż-żewġ ġenerazzjonijiet ta’ artisti jqisu li xogħolhom għandu sinifikat politiku, mhux biss minn perspettiva ideoloġika u poetika, iżda wkoll minn waħda teknika u materjali. Huma jikkonċepixxu l-prattika artistika tagħhom bħala waħda li tikkomunika f’isem il-komunità li jappartjenu għaliha, kif ukoll bħala xhieda kritika dwar kwistjonijiet attwali ta’ importanza soċjali.
Barra minn hekk, kif se jidher f’dan il-katalgu, bosta artivisti fost dawk magħżula ħarġu paralleli bejn il-proċeduri, l-istrateġiji u l-forom kollaborattivi tax-xogħol artistiku tagħhom u l-proċessi ta’ deliberazzjoni, negozjar u teħid ta’ deċiżjonijiet tipiċi ta’ sistema demokratika parlamentari.
L-għażla ta’ xogħlijiet mill-Kollezzjoni tal-Arti Kontemporanja tal-Parlament Ewropew tiffoka fuq artisti li wrew impenn għar-realtajiet soċjali u politiċi ta’ żmienhom fil-karrieri u x-xogħlijiet tal-arti tagħhom, b’mod partikolari Emilio Vedova, A.R. Penck, Georg Baselitz, Felix Droese, Darío Villalba, Jannis Kounellis u Adolf Frohner. Ix-xogħlijiet u l-karrieri rispettivi tagħhom, inkluża l-parteċipazzjoni tagħhom fi gruppi artistiċi u l-adeżjoni tagħhom ma’ manifesti, jixhdu ċerta attitudni ta’ ribelljoni kontra sitwazzjonijiet storiċi, politiċi u soċjali li jistgħu jillimitaw jew jheddu l-libertà tal-ħsieb u tal-espressjoni.
Xi wħud minnhom urew ir-rieda li jindirizzaw suġġetti, kwistjonijiet u realtajiet li huma skomdi għall-pubbliku u għall-poter politiku – karatteristika li hija evidenti fit-trajettorja ta’ artisti bħal Darío Villalba, Claus Carstensen jew Yiannis Psychopedis. Ix-xogħlijiet tagħhom jirriflettu b’mod konsistenti l-konvinzjoni li l-fatt li wieħed ikun pittur jew artist viżiv jinvolvi r-responsabbiltà inevitabbli li jbiddel il-perspettiva tal-ispettatur.
Minbarra l-artisti msemmija hawn fuq, u sabiex tiġi stabbilita rabta mal-preżent, il-wirja tinkludi ġabra ta’ kontributi minn artivisti żgħażagħ. Ħafna minnhom ipproduċew biċċa arti jew intervent fil-proġett “Pop the vote! Culture on the ballot” imniedi minn Culture Action Europe u kofinanzjat mill-Parlament Ewropew. L-objettiv ewlieni ta’ din l-inizjattiva kien li tħeġġeġ ċittadini żgħażagħ jivvutaw fl-elezzjonijiet Ewropej tal-2024, speċjalment f’pajjiżi bħall-Belġju fejn tbaxxiet l-età tal-votazzjoni.
Il-wirja tirrikonoxxi l-ħidma ta’ artisti Ewropej li l-karrieri tagħhom kienu kkaratterizzati minn impenn għal-libertà politika u l-libertà tal-espressjoni – xi drabi mhux mingħajr riskji għalihom infushom jew għall-iżvilupp professjonali tagħhom. Dawn l-artisti kellhom rwol sinifikanti fl-espansjoni tal-limiti tekniċi u tematiċi tal-arti viżiva, billi ssugraw jisfidaw il-konvenzjonijiet u ċ-ċensura. L-għażla sħiħa hija organizzata f’erba’ kapitli, li jirriflettu t-temi predominanti indirizzati kemm fix-xogħlijiet tal-kollezzjoni kif ukoll fl-artiviżmu tal-ġenerazzjoni żagħżugħa.
- 1. Il-libertà tal-espressjoni, il-libertà tal-ġest u tal-lingwa
- 2. L-etika u l-libertà politika, id-demokrazija u l-votazzjoni
- 3. Il-migrazzjoni: integrazzjoni u identità Ewropea
- 4. Nieħdu ħsieb dawk l-aktar vulnerabbli
- 5. Additional Resources
[i] Nossel, S., ‘Introduction: On ‘Artivism,’ or Art’s Utility in Activism’, Social Research: An International Quarterly, Vol. 83, Nru 1, 2016, pp. 103–105. Project MUSE, https://doi.org/10.1353/sor.2016.0023.
Għal raġunijiet organizzattivi u tekniċi, mhux ix-xogħlijiet tal-arti kollha inklużi hawnhekk jistgħu jintwerew fl-ispazji kollha tal-wirjiet – għall-ewwel Brussell u Strażburgu.